Di Chairman of Peoples Democratic Party (PDP) for Maradun Local Government Area of Zamfara State, Alhaji Muttaka Dalhatu, don comot from di party join All Progressives Congress (APC), together with members of im executive and some ward chairmen.
Dem officially welcome di defectors on Wednesday for Abuja house of di Minister of State for Defence and former Zamfara Governor, Bello Mohammed Matawalle.
As e dey talk on behalf of di group, Dalhatu tok say di decision come after serious consultation and because dem no happy with how di present PDP-led government dey run Zamfara State, especially on security matter.
E praise Matawalle performance as former governor, say e try im best to fight insecurity during im time for office.
Dalhatu accuse di current administration say dem fail to fulfil dia campaign promises and instead dey focus more on political fight than governance.
According to am, di defectors no wan join anybody wey wan spoil Matawalle name just because of politics.
READ ALSO: Senate Confirm 64 Career and Non-Career Ambassadors
“As people from Maradun, we no fit follow anybody wey wan spoil di name of our own person wey don help for di development and stability of Zamfara State,” Dalhatu tok.
Among people wey follow am join APC na Maradun PDP Secretary, Alhaji Sani Ibrahim JB Danbaza; former State Assembly aspirant, Hon. Bashar Muhammad Danbaza; PDP Chairman for Damaga Ward, Mallam Umar Attahiru; and PDP Youth Leader for Gora Namaye Ward, Hon. Zayyanu Yakubu.
Dalhatu still talk say plan dey ground to receive more PDP members for di coming days.
While dey welcome dem, Matawalle describe APC as open and inclusive party wey dey care about di welfare of im members. E assure di new members say dem go get equal opportunity and promise to support dem make dem contribute to di growth and success of di party.